«ما أبغى أستوعب» بقلم عبداللطيف بن عبدالله آل الشيخ

ما أبغى أستوعب .. قناعات و خنوع
دام التغافل .. ينتصر للكرامه

لو كان للإدراك .. أَنوار و سطوع
بعمي بصيرة واقعي في ظلامه

بطفي يقين الوعي .. و اولِّع شموع
تخلق من اوهام التجاهل .. غمامه

أنا شموخي .. يِجْبِر القِمَّه ركوع
ما انزل لقاع الانكسار و حطامه

لو اختنق لا تنتظر منّي خضوع
ما أبغى أفهم .. فلسفات السلامه

الجهل في شرع التفاصيل .. مشروع
لا صار فهمك .. يطعنك بالملامه

لو المذلَّه دِرْع يحمي لي ضلوع
كسَّرت ضلعي .. بدون ايَّتْ ندامه

أمشي و تمحي خطوتي سكة رجوع
و افرض على ظِل العَوَج .. إستقامه

و اصلب بقايا المنطق بـ جذع مقطوع
و ارسم على ثغر الجهل .. إبتسامه !

و اقطع وريد الوعي .. لو سال ينبوع
و اعلن على عقل الرضوخ .. القيامه !