طيب يا طيب … وفي الوعي حياة ونجاة ياطيب

بقلم /ياسمين حافظ

الطيب يتمنوه
لكن للأسف دايما يحبوا يستهلكوه !!

يزعلوه ويستنزفوه
ولما يغضب ويقول كفاية
يلوموه ويغلطوه !!

وكأنه جماد من غير مشاعر
زي الآلة بيحركوه
وقت ما يناسبهم يفتكروه
ووقت تاني من حساباتهم يلغوه !!

ويعيشوا على مزاجهم
ويتصرفوا براحتهم
أصله طيب وبسهولة
بيراضوه !!

بيسكت كتير
ويكظم غيظه
ويعذر غيره
ويسامح في حقه
ودايما قلبه بيحب يتصالح
ومايكنش جارح

لا عمره شال من حد
ولا بيعرف يشيل
ولو قدامه يرد على كل المؤذيين
يقول ربنا يهدي
ويفضل عنهم بعيد

لكن أول ما يختار نفسه
ويقول كفاية
مش قادر أشيل كتير
بعد ما استهلكوا طاقته
واستحمل فوق طاقته بكتير
يقلبوا عليه الترابيزة
ويقولوا ده طلع ندل
ده طلع خسيس ده
هو الشرير !!

اشهدوا يا ناس يا طيبين
أهو ده الطيب ابن الناس الطيبين
اللي كان يسامح ويعذر
ويحتوي ويصبر
ولما تعب وقال كفاية
بقى هو الغلطان
وبقى هو اللي يستاهل اللوم
بقى من المزيفيين !!

طيب يا طيب
حقك عند ربنا الكبير
اللي يعلم اللي بيخفوه
واللي ما تخفى عليه صغيرة ولا كبيرة
ولا يغفل يوم عن الظالمين

بس يا طيب اسمع مني كلمتين
وخليهم في قلبك محفورين

اوعى تسكت عن حقك
وقول لأ لكل أذى
ما تخليش طيبتك باب مفتوح
يدخل منه كل مؤذي
ويروح !!

الطيب ما يستحملش الأذى
ولا يرضى بالظلم والوجع والاهانة
الطيب يطالب بحقه من غير أذى
ويحفظ كرامته من غير ما يجرح
ويحط حدود من غير ما يظلم
ويبعد عن كل تجاوز …..

ما تستهونش بنفسك
ولا تسمح لحد يستهون بيك
ما تستهلكش روحك علشان ترضي غيرك
ولا تفضل طول عمرك تخسر نفسك علشان تكسب اللي حواليك !!

خليك طيب بس بوعي
حنين بس مش مستباح
سامح بس ما تتنازلش عن حقك
واحتوي بس ما تسمحش لحد يهد حيلك !!

طيب يا طيب

خليك طيب بس ما تكونش ضحية طيبتك
وخليك رحيم بس ما تنساش نفسك
فالطيبة مش ضعف
والتسامح مش تنازل عن الحق
والقلب الطيب برضه من حقه يعيش في راحة وأمان
ويعرف يحط حدود
بينه وبين أي ندل وجبان !!