معقول.. بقلم / ياسمين حافظ

معقول كده
يحصل كل ده
طب إزاي كده
نوصل لده وده ؟؟!!

صدمات وخبطات
إزاي عديت بالظبط !!
ودي كانت حكمته
مابين السطر والسطر

كنت بتشوفهم بعينك الحلوة
بعين شايفة الخير في كل حتة
بعين بتصدق
وبتطمن وبتدي
من غير ما تحسبها

وفجأة اتغيرت النظرة
مش عشان عينك بقت وحشة
لكن عشان الحقيقة ظهرت
بعد ما كانت مستخبية ورا الصورة الحلوة

يمكن هم ما اتغيروش
يمكن إنت اللي اتغيرت رؤيتك ليهم
بعد ما شفت حاجات
ما كنتش مستعد تشوفها فيهم

يمكن اللي وجعك
كان هو اللي وعاك
واللي كسرك
كان هو اللي قواك

يمكن ما كنتش بتخسرهم
يمكن كنت بتكسب نفسك
وبين كل صدمة والتانية
كنت بتشوفك
بعد ما كنت ناسي نفسك

عجيب اوي أمر الصدمات
تاخد منك أمان
وتديك وعي
تاخد منك ناس
وترجع لك نفسك

وفي الوعي حياة
وفي كل صدمة
حكمة مستنية تتقري
مابين السطر والسطر ………